«Аба эжын хэлэн гамтайл»
Октябрь hарын 24-ндэ Агын Буряадай тойрогто эмхидхэгдэжэ байhан Буряад хэлэнэй фестивалиин үедэ Агын дасанай ламанар ба Буддын эмнэлгын академиин багшанар «Аба эжын хэлэн гамтайл!” гэһэн мүрысөө үнгэргэбэ. Мүрысөөнэй гол зорилгонь хадаа үхибүүд аба эжынгээ түрэл хэлэ мэдэжэ, хүндэлэн үргэжэ, ёһо заншалаа арюун сэбэрээр сахижа, ерээдүй сагай ургажа ябаhан үхибүүдтэ зүрхэ сэдьхэлдэнь нэбтэрүүлэн ойлгуулжа, ухаандаа хадагалжа ябахын тула эмхидхэгдэнэ.
Ага тойрогой гимнази интернадай, Үбэр Аргалиин, Сахюуртын, Будаланай, Орловскын, Зугаалайн, Уртын, Сагаан-Уулын, Амидхаашын, Агын нэгэдэхи юрэнхы болбосоролой дунда һургуулинуудай һурагшад энэ мүрысөөндэ хабаадаба. Эгээн түрүүн танилсан «Түрэhэн нютаг-тоонтомни» гэhэн сэдэбээр видео, презентанци харуулба, «Угсаата зоной угай hургаал» гэhэн баримтануудые бүлгэм бүхэн шүүгшэдэй анхаралда барюулба.
«Аба эжын хэлэн гамтайл» табан шатаhаа бүридхэгдэбэ,
10 бүлгэмэй гэшүүд hубаряад мэдэсээрээ, дүримөөрөө урилдаба.
1 шата — Хонин тала — «Минии хэлэн — буряад хэлэн».
*Оньһон үгэ мэдэхэ гүт?
2 шата — Морин тала — «Аба эжын hургаал мүнхэ».
*Архи тамхин — ами наhанай дайсан.
*Угайм hургаалнууд.
3 шата — Үхэр тала — «Би зорюулнаб!».
*Сагаан эдеэн табаг.
4 шата — Тэмээн тала — Уран гартан.
* Далгын туулмаг.
5 шата — Ямаан тала — «Угайм hургалнууд».
*Капитануудай конкурс-Дүхэриг «Буян ба нүгэл».
Шүүгшэдэй гэшүүдэй дүн татаха үедэ Цыренжапов Бадма лама «Эрхи тухай», яагаад зүб татахаб, хэрэглэхэб г.м. хөөрэбэ, Мунко-Жаргал лама «Гороо тухай», Бальжинима лама «Лусад тухай» хабаадагшадта хөөрэбэ, асуудалнуудта харюусаба.
Дүнгүүд:
Амидхаашын һургуули – нэгэдэхи,
Зугаалайн hургуули — хоёрдохи,
Агын нэгэдэхи hургуули — гурбадахи һуури эзэлбэ.
Хамта «Аба эжын хэлэн гамтайл» мүрысөөндэ 85 хүн хабаадаа.
Үхибүүд бултадаа буряад хэлээрээ харилсан, һайн бэлэдхэлтэй байгаа гэжэ тэмдэглэмээр. Шата бүхэндэ hуури эзэлhэн үхибүүдтэ Баталамжа, мүнгэн бэлэг баригдаба, багшанарта Баярай бэшэг, илажа гараhан бүлгэмүүдтэ Агын тойрогой захиргаанай зүгhөө Дипломүүд, сертификадууд, Агын дасанай зүгhөө Баярай бэшэгүүд. Эдэбхитэй хабаадаhан бүлгэмүүдтэ Баярай бэшэг ба мүнгэн бэлэг барюулагдаба.
Хишигто Жигзымаева
